36 كيلو ونص ..

الريجيم .. الدايت .. وكما يقول خبراء التغذية .. الحميه الغذائية !!

الحلم السهل الممتنع لكل ما يزيد وزنه عن 59 كيلو جرام 😲.. حقيقي ! .. ايوه حقيقي فعلاً !! خاصه النساء
انت تخين !؟؟ .. اقرأ هذا المقال ستستفاد من تجربه السهل الممتنع 👇👇
المقال بالعامية المصرية علي لسان صاحب التجربة مع أجراء تعديلات بسيطه للتوضيح ليس ألا ..
( انا حسين علي أحمد .. 32 سنه .. متزوج من 7 سنين .. معايا ولد 6 سنوات وبنت 3 سنوات .. ومن هنا بدأت الحكاية .. الريجيم ده كان حلم بالنسبالي زي ما هو حلم بالنسبة لناس كتير جداً جداً .. فيه اللي حلم بيه وصحي ماكملهوش .. وفيه اللي حلم بيه وحققه ورجعت ريما لعادتها القديمه ولا كأنه عمل حاجه .. وفيه اللي حلم بيه وحققه وثبت علي موقفه واتحولت حياته 360 درجه .. فعلاً فعلاً 360 درجه !!! .
انا اخترت النوع التالت .. قولت ليه ما حولش حياتي زيهم وارجع أعيش تاني زي الاول .. اصل كل ما ابص لصوره الفرح اللي متعلقة في الصاله اتحسر علي نفسي .. وأسأل نفس السؤال السخيف .. مين ده ؟!!.. معقول أنا ده اللي  بشوفه في المرايه ؟!!! .. انا ده اللي بيطلع السلم الدور الرابع او الخامس بينهج وبيطلع في الروح ؟!!! .. فعلاً فعلاً كنت بموت .. نفسياً وصحياً !!!
بدأت الحكاية في رمضان 2019 بالصدفة .. مش بالصدفة بالظبط .. أنما ظروف شغلي خدمتني كتير .. كتير جداً جداً .. اصل انا شغال في التبريد والتكييف .. يعني حركه وتنطيط من هنا لهنا .. وبطبيعه الحال علشان رمضان جاي في الصيف .. كان الشغل كتير وبالتالي مش بعرف أفطر في البيت تماماً ... فكنت بفطر في الشغل .. وأوقات السحور في الشغل او مش بتسحر خالص ... وبطبيعه الحال برضه علشان الصيام الصبح كنت بشرب مياه كتير جداً بعد الفطار لغايه الفجر .. سواء أتسحرت او لأ .. وفي 11 رمضان بالظبط لاحظت حاجه خلتني طاير من الفرحه ...
 انا خسيت 5 كيلو !!!! ..
ازاي ؟ .. مش عارف .. مبسوط طبعاً ... هاطير من الفرحه فعلاً !!.
توهت معايا حضرتك !! انا اسف معلش .. مش بقولك مبسوط .. علشان كده بكتب بسرعه .. خلاص .. هاكتب بهدوء وهاقولك بالظبط ايه اللي حصل ...
انا داخل رمضان وانا 107 كيلو .. وفي 11 رمضان بقيت 102 كيلو .. وعلي نفس الميزان اللي وزنت عليه أول مره .. طب ازاي ..؟! .. مش هاقولك مش عارف .. لأ .. انا ركزت وعرفت المشكله فين وعلي أساسها وضعت طريقه ماشي عليها لغايه الوقت اللي بعتلك فيه الرساله دي .. وربنا يقدرني وهامشي عليه لغايه ما أوصل للرقم اللي انا عايزه .. 65 كيلو !! خلينا نتكلم بالترتيب ..
1- انا كنت باكل بالليل .. يعني الأكل محتاج من 8 : 10 ساعات علشان يتهضم .. ولو ما كنتش صاحي بعد الأكل 8 او 10 ساعات هايتحول لدهون يعني هاتخن .. فقولت انا هاكل قبل ما انام ب 8 ساعات .. وانا بأنام الساعه 3 الفجر يعني اخر اكل ليه الساعه 6 المغرب ...
2- بالنسبة للفطار .. ببدأ اهم شئ بمعقله كبيره او اتنين صغيريين من العسل الأبيض .. وبعدين بفطر كويس جداً وأي حاجه بأكلها في الفطار .
3- الغدا بيكون برضه أي حاجه بس لازم لازم مايكونش بعد الساعه 6 او 7 بالكتير ... وخلتني علي الوضع ده - لبعد رمضان طبعاً - لغايه ما نزلت 36.5 كيلو بعد 8 شهور من تنفيذه ..
4- وطبعاً طبعاً شرب المياه كل يوم من 5 : 7 لتر يومياً .
هاقولك ايه اللي اتغير في حياتي ؟ .
انا حياتي كلها اتغيرت .. بلبس اللي انا عايزه .. ثقتي في نفسي .. الكرش اللي كان مكبر سني 20 سنه واكتر اختفي .. بقيت بطلع السلم لعاشر دور ومش بنهج مع اني مدخن .. بقيت ثقتي في نفسي فوق الحدود .. بقيت بحب الصور جداً جداً بعد ما كنت بتكسف افتح الكاميرا الأمامية أصلاً .. بقيت رشيق وخفيف الحركه ومش بتعب من الشغل بعد ما كنت في نص اليوم عايز اروح علشان فصلت وهمدت .. وحاجات كتير جداً جداً اكتشفتها في نفسي وفي حياتي ومش كنت بشوفها ولا بعيشها للأسف .. وعرفت ان ما فيش مستحيل وان الإرادة موجوده بس انا اللي كنت دفنها تحت الدهون والكرش والأرداف ... بدأت اشوف نفسي وبشوف العالم بنظره تانيه خالص ..
هي دي تجربتي مع الرجيم او الدايت .. ال 107 دول كانوا جزء من حياتي اختفي ومش هايرجع تاني .. وأصبح الرقم 36.5 هو اكتر وأهم رقم في حياتي كلها 💪💪)
وانتهت الرساله .. ومعها بدأت بداخلي شعور بالحماسة والإرادة لا يمكن وصفه !! .. ليس الموضوع مجرد ريجيم او حميه غذائيه .. الموضوع اصبح  ( فكره كيف تفعل المستحيل حتي تري العالم بشكل جديد )